ئاگر نەورووز نمادێگە ئەڕاێ سقام داێن وە یەکگرتن دمۆکراتیک خەڵقەیل ئەڕاێ ڕەسین وە ژیانێگ ئازاد و هاوبەش

0
436

سروەێ کەلەواێ وەهار جارێگ ترەک لە بارودووخێک وە وڵات کۊەنەساڵ ئیمە شنیەێدن و خەڵق ئیمە ئاگر نەورووز جارێگ ترەک لە حاڵێگ هەڵگیرسنێدن ک هەچۊ ساڵەیل جاران زمسان و سەرماێ هەژاری و فەڵاکەت و دیکتاتۆری و دچەوەکی و ستەم و سەرکوت ژیان خەڵق ئیمە و خەڵقەیل ترەک ئەی سەرزەوییە گردیەسە وەر و کڕیوە و یەخبەنان مەرگهاوەرێگ داسەپانیەسە سەر ژیان کوومەڵایەتی ئیمە. ساڵ ترەکێگیش ویەرد و هەلەیوا ک دیمن، ڕەژیم سەرمایەداری ئسلامی لە درێژاێ ژیان ڕۊ وە هناز مردن خوەی، وە فرەترکردن دچەوەکی و نایەکسانی و داسەپانن لەونەیل جووراجوور ستەم وە ژیان خەڵقەیل و توودەیل زەحمەتکیش وە شەدەت بێشتر لە جاران هەوڵ دا تا دەرفەتێگ نیەێد وە خەڵقەیل ک وە پیری وەهار بچن و وە خیاڵ خوەی وەر شنیاێن کەلەواێ سەرماشکن و زمسانکوش نەورووز بگرێدن.
ساڵێگ ک ویەرد پڕ بۊ لە ڕۊداوەیل تاڵ و شیرن و هەڵاماتەیل و واوەسەیل. لە دەفتەر ساڵ کۊەنە هۊرمان تاڵێگ لە جیایی خستن ڕژیم دۊاکەفتنخواز سەرمایەداری ئسلامی لەناو مەردم کورد لە باشوور ڕووژهەڵات کوردستان و وە شێوەێ دیاری مەردم کورد سوننی و یارسان نۊسریا. هەر ئەوجوورە ک خەڵق ئیمە ئاگادارە، وە شوون شەدەت پەیدا کردن قەیران ئاو و هەوایی و وشکەساڵی بێ وێنە لە خوەرهەڵات ناوەڕاس، زەمینەێگ ئەڕاێ وە دی هاتن ئاژاوە وە سەر دەسڕەسی وە سەرچاوەیل خوەش کریا و لەی ناوەێنە بڕێگ دەسەیل ئاشکرا و نەهێنی لەلایەن دۊاکەفتنخوازەیل ئەی زەمینە ئەڕاێ پێش بردن سیاسەتەیل دژەمەردمی و جیایی و دوبڕەکی خستن لە ژێر ناو ئایین جوور دەرفەتێگ زانسن. لە ڕۊداوەیل تاڵ و دڵتەزنێگ ک وە تایوەت لە تاوسان ئمساڵ قوومیا، نزام دەسەڵاتدار یەێ کەڕەت ترەک ستەم و سەرکوت خوەی لە وەراێوەر مەردم کورد –لە شیعە و یارسان و سوننی- نیشان دا و وە ئەوکارگردن دوڕۊانەترین ئستراتێژییەیل ئەمنیەتی لە وەراێوەر خەڵق کورد و وە تایوەت دانیشتییەیل ناوچەێ داڵاهوو هەوڵ دا تا وێنەێ دڵخواز خوەی لە پەیوەندییەیل کوومەڵایەتی لە ئەی ناوچە وە دی بارێد. ئەگەرچە وە هووشیاری دڵسووزەیل و کەسایەتییەیل وەئاوەز ک جوور سەرمایەیل کوومەڵایەتی خەڵق کورد و پێکهاتەیل شووناسی و ئایینی کوومەڵگاێ ئیمەن ئەی پیەڵاێ ئستێعمار بێ ئاکام مەن، ئەمانی سوڕ وساێن دەسەیل وابەستە وە دەسڵات وەمل درێژەداێن وە ڕۊداوەیل و وە دی هاوردن زنجێرەێگ لە کردەوەیل ئاژاوەخوازانە نیشان لە ئرادەێ دەسڵات ئەڕاێ تۊش قەێران کردن ژیان سیاسی و کوومەڵایەتی مەردم کورد دێریدن. وەی هووکارە ئەو چشتێگ ک گشت هازەیل و دامەزریاگەیل سیاسی پێشڕەو پەیوەندیدار وەگەرد کوومەڵگاێ کوردستان بایەد وەر جە هەر چشتێگ وەر چەو بگرن، جەخت کردن فرەتر لە سەر یەکێتی دمۆکراتیک مەردم کورد، یەکتر قەبوول کردن و وە فەرمی ناسین شووناسەیل و هەڵگ داێن ئەڕاێ وە دی هاوردن فەزاێگ ئارام ناوبەین شووناسەیل جووراوجوور ناو کوومەڵگاێ کوردە کە ئەڵبەت تەنیا وە ئاشکرا کردن بەرنامەیل وێرانکەر و جیاییخەر دەسڵات ئستێعماری کامڵەو بوودن.
لە ساڵێگ ک ویەرد هەلەیوا دیمن ک ڕەژیم سەرمایەداری ئسلامی درێژە وە سیاسەتەیل گشتی کردن هەژاری و فەڵاکەت دا و لەی پێناوە دەوڵەت تازەێ «ڕەئیسی»ش ک لە هەڵوژاننێگ نامەشرووعتر لە هەمیشە وە هاز ڕەسیە، وە شێوەێ دیاریکەر و بنەمایی لە سیاسەتداناێن ئقتسادی خوەی هەونەگلیا و لە بار پەیرەوی کردن لە ئەسڵەیل بنەمایی هەر ئەو ڕێگاێ گشتی دەوڵەتەیل پێشین هەڵوژانی. ئەی کەڕەت نەوبەت وە سەرووک دەوڵەت وابەستە وە سپاێ پاسداران ڕەسی ک وە پەیرەوی لە سیاسەتەیل دەوڵەتەیل وەرین کێشەیلێگ جوور هەڵساوەێ بێ لقاو، بێکاری و مەعاش مردم گریە بیەێدە ڕاوێژکارییەیل بەرجام و وەی شێوە سەرپووش بنەێدە مل ناکارامەیی و گەندەڵی سیستماتیک ڕەژیم. لە لاێ وەراێوەریش دیمن ک جمشتەیل مەردمی بێکردار نەۊنە و لە بارودووخێگ ک ڕەژیم هەڵگ دا تا وە بوونەێ کۆرۆنا قەێرانەگە بەجەر بکەێد و کوومەڵگا بخەێدە تەنگاوی، وەلێ واوەسەێ گروهەیل مەردمی هەم دوارە لە سەر گیریاس. ئەی بارودووخە کوومەڵگاێ کوردەیل باشوور ڕووژهەڵات کوردستانیش هەچۊ ساڵەیل وەرین کردە ئاراێ گوشار لەلایەن دەسڵاتدارەیل و واوەسە لەلایەن بندەسەیل. وەدۊاێ دو ساڵ هاوری وە قەێران ک لە سەرهەڵدان خەڵقەیل ئێران لە مانگ ئابان ١٣٩٨ ویەرد، لە ساڵ کۊەنە دیمن ک گرووهەیل جووراوجوورێگ وێنەێ موعەلمەیل، بازنشەستەیل و کارکەرەیل لە سەراێسەر ڕووژهەڵات کوردستان شان و شان ناوچەیل ترەک جوغرافیاێ ئێران هەناس تازەێگ دانەسە ئەی واوەسەێ مەردمییە و وە هاتن وە سەر خیاوانەیل وە شێوەێ پەیگیر و پەیەڵپەی لە وەراێوەر هەڵاماتەیل ئقتسادی و سیاسی وە ژیان زەحمەتکیشەیل کوومەڵگا وسانەس. لەی شەپووڵ ناڕەزایی ک خوەی وە شکڵ کووبۊنەیل سنفی ئاشتیخوازانە نیشان داس، ژنەیل نەخش گرینگێگ لە پێشەنگایەتی تێکووشانەیل داشتنە و بجگە ئەوە کوومەڵگاێ باشوور ڕووژهەڵات کوردستانیش جارێگ ترەک جۊلەوەر بۊن خوەی وەی نمایشت داناس.
لە ساڵێگ ک ویەرد جهان شایەت کارەساتەیلێگ جوور بەردەوام بۊن شەڕ و وەیەکدانەیل مەرگبار لە غەزە، یەمەن، سووریە، لیبی، لێوارەیل ئافریقا و میانمار، پیەڵاێ هازەیل ناوچەیی و جهانی ئەڕاێ هەڵگەردانن بناژووخوازەیل تاڵبان وە تەخت دەسڵات لە ئەفغانستان، ئارا داێن فرەتر وە ڕەژیم فاشیست ترکیە ئەڕاێ جۊڵیاێن فرەتر لە ئاسیاێ ناوەڕاس و قەفقاز، و شەڕ زڵهازەیل لە ئووکراین بۊ. لەی ناوبەینە ئەگەرچە ڕەژیم فاشیست ترکیە لە هەڵاماتەیل داگیرکەرانەی تۊش شکستەیل سەنگینێگ لە باشوور و ڕووژاواێ کوردستان بۊ و نەتۊەنست نەخشەێ دژەمرووڤانەێ خوەی ئەڕاێ هەڵمەت هاوردن دوارە وە ڕووژاواێ کوردستان کردارییەو بکەێدن، وەلی هەم وە شێوەێ ڕاساێڕاس و هەم لە ڕێگاێ هێڵ خیانەت درێژە وە هەڵاماتەیل خوەی وەتایوەت لە ناوچەیل ئازاد میدیا و قەندیل سەربەرز، شنگال و ڕووژاوا دا. وە مدووێ ئەی بارودووخە کوردستانیش لە ساڵ کۊەنە یەکێگ لە بەرەیل شەڕ لە جهان مەن و خەڵق کورد تۊش خەسارەیل فرەێگ بۊ. مزنە گرتن وە جێگاێ کوردستان لە ناوبەین شەڕانشووییەیل هازەیل جهانی هەرچە فرەتر ئەی زەروورەتە نیشان دەێد ک جمشت دژەشەڕ و فاشیزم ک ئاڵاگەی لە خوەرهەڵات ناوەڕاس هەمیشە لە دەس کوردەیل -چۊ دانیشتییەیل بنەکی موستەعمرەێگ ناونەتەوەیی- بۊە، بایەد ڕۊدارتر بوودن و وەهازتر لە هەمیشە دەنگ خەبات کوردەیل دژ وە فاشیزم و شەڕسالاری بڕەسنێدە گووش مەردم جهان.
ئەی پەیامە وەتایوەت لە ڕووژەیلێگ ک هەمیشە ئەڕاێ خەڵق ئیمە وەگەرد هۊر هەڵاماتەیل شیمیایی دڕندانەێ ڕەژیم فاشیستی بەعس وە هەڵەبجەێ شەهید و نەودشەێ ئازیەتبار و هەلەیوا هەڵاماتەیل فاشیزم مللی-مەزهەبی ترکیە وە عەفرین داگیرکریاێ هاوڕێیە، خوەی لە هەڵگیرسانن ئاگر ژیان لە نەورووز خەڵق کورد مانا کەێد. خەڵق ئیمە چۊ هەبۊنێگ ژێر ئستێعمار پەیام ئاشتی و ئازادیخوازی و بەرابەریخوازی خوەی وە چەودێری کردن ئاگر هەڵگیرسیاێ نەورووز وە جهان ڕەسانیە. ڕووڵەیلێگ جوور شەهیدەیل «مەزلووم»، «ڕووناهی» و «بریوان» وە پێشکەش کردن گیان خوەیان ئرادەێ خەڵق ئیمە ئەڕاێ ڕەسین وە ئازادی، بەرابەری و ئاشتی وە مەردم جهان سەڵماندنە و وە سەر ئەی بنەما ماناێ بڵۊزەیل ئاگر نەورووز وە دی هاتن ئرادەێ ئازاد خەڵقە و ڕووشناێ ئەی ئاگرە پرشەێگە ک شەهیدەیل لە قۊڵایی دیرووک خەنە مل واوەسەێ ڕووژگار ئیمە.
هەر ئەی ماناێ شووڕشگەرانەس ک بائس بۊە تا دژمەنەیل خەڵق لە هۊچ هەوڵێگ ئەڕاێ کوشانن و یا گووڕانن ماناێ ئاگر نەورووز دریخ نەکەن و هەر ئەوجوورە ک لە ڕووژەیل دۊایی دیمنە لە پەیرەوی لە فاشیستەیل ترکیە تواستنە ک ڕێوڕەسم ئاگر نەورووزی قەدەخە یا مەحدوود بکەن و هەوڵ دانە تا چوارچووەیل ئستێعماری خوەیان دابسەپنن وە کوومەڵگا و یا لە ڕێگاێ ڕەوشەیل جووراوجوور وێنەێ دەوڵەتی کردن نەورووز یا زاڵ کردن پەیوەندییەیل سەرمایەدارانە وەر هیز گردن دەنگ ڕاسگانی مەردم بگرن و ماناێگ درووگانی وە ئەی کردار مەردمییە بێەن. سەروار یە، تەجربەێ خەڵقەیل لە دیرووک خوەرهەڵات ناوەڕاس و لەوای خەڵق کورد نیشان داس ک خوڵەکووێ ئیدەئۆلۆژی هازەیل دژەمەردمی هەرگز نەتۊەنستیە ئاگر شووڕش مردم و «یەکگرتن، ئازادی و ژیان هاوبەش» لە ژێر خوەی بشاردەو و ئەی ئاگرە هەر کەڕەت بڵێنتر و گڕتر لە پێش شەماڵە کردیە و وە لە ناو بردن سەرماێ هەژاری و دیکتاتۆری و سەرکوت، مزگانی وەهار ترەکێگ هاوردیە.
ئیمە چۊ رێکخراو یاری کورد و پلاتفۆرم یارسان لە کووتایی ساڵ کۊەنە و لە وەرەتاێ وەهارێگ نوو یەی کەڕەت ترەک وە ئرادەمان ئەڕاێ درێژەداێن وە ڕێگاێ شەهیدەیل جەخت کەیمن و خەڵق یارسان لە سەراێسەر جوغرافیاێ خوەرهەڵات ناوەڕاس وەتایوەت لە ئێران و عێراق وە ئاشنابۊن هەرچە فرەتر وەگەرد ئارمان شەهیدەیل و هەنگاو ناێن لە ڕێگاێ تێکووشاێن داوەت کەیمن. ئیمە نەورووز جوور نمادێگ لە «یەکگرتن، ئازادی و ژیان هاوبەش» وە خەڵقەیل سەراێسەر خوەرهەڵات ناوەڕاس، خەڵقەیل ئێران و کوردستان و وەتایوەت وە خەڵق یارسان –لە مازەندەران تا کرماشان و لە دڵفان تا ئازەربایجان و لە تێران و قەزوین تا هەمەدان و کەرکووک- پیرووزبایی کەیمن. هەلەیوا ساڵ تازە وە گشت کارکەرەیل، وەرزێرەیل و ژنان زەحمەتکیش، زندانییەیەل سیاسی و گشت تیکووشەرەیل ڕێگاێ ئازادی، بەرابەری و ئاشتی پیروزبایی کەیمن و شنیاێن کەلەواێ وەهاری و هەڵگیرساێن ئاگر نەورووز جوور دەرفەتێگ نمادین ئەڕاێ سقام داێن وە یەکگرتن دمۆکراتیک ئەڕاێ ڕەسین وە ژیانێگ ئازاد و هاوبەش زانیمن ک هەرلەیوا ک دیرووک سەڵماندیە، بجگە وە تێکووشاێن و فەداکاری وە شێوەێگ ترەک وە چنگ نیەتیەێدن.
رێکخراو یاری کورد
پلاتفرۆم یارسان
٢٨ ڕەمشان ١٤٠٠

LEAVE A REPLY

Please enter your comment!
Please enter your name here